Xyoylund "Yunayted"dan ketishining asl sababini aytdi

Rasmus Xyoylund "Manchester Yunayted"dan ketishi haqida gapirib, klubda o‘zini endi kerak emasdek his qilganini tan oldi.

"Men hatto ular meni u yerda ko‘rishni boshqa istamayapti, deb o‘ylaganimni aytdim. Shuning uchun variantlarimni baholashim kerak edi va "Napoli" men uchun to‘g‘ri tanlov bo‘ldi", — dedi Xyoylund Gazzetta dello Sport nashriga.

Daniyalik hujumchi 2023 yilda "Atalanta"dan 64 million funtga "Manchester Yunayted"ga o‘tgan edi. U debyut mavsumida 16 ta gol urdi, keyingi mavsumda esa Ruben Amorim qo‘l ostida APLda bor-yo‘g‘i 4 ta gol qayd etdi.

Xyoylundning aytishicha, Antonio Kontening shaxsiy qo‘ng‘irog‘i uni "Milan" o‘rniga "Napoli"ni tanlashga undagan.

Hujumchi, shuningdek, "Manchester Yunayted"ning 2025 yilgi Yevropa ligasi finalida "Tottenxem"ga mag‘lub bo‘lishini faoliyatidagi burilish nuqtalaridan biri deb atadi.

Xyoylund o‘tgan mavsumni "Napoli"da ijara asosida o‘tkazib, A Seriyada 12 ta gol urdi. Keyinchalik uning transferi to‘liq rasmiylashtirildi va u joriy mavsumda ham neapolliklar safida gol urishda davom etmoqda.

Manba: stadion.uz