«Liverpul» Salohning oʻrniga 130 million funtga futbolchi olib kelmoqchi

Mersisaydliklar Muhammad Salohga uzoq muddatli istiqbolda oʻrinbosar sifatida qaralayotgan 19 yoshli braziliyalik futbolchi boʻyicha allaqachon ma'lumot toʻplashni boshlab yuborishdi, deya xabar bermoqda TEAMtalk.

«Liverpul»ning yangi bosh murabbiyi Andoni Iraola (avval «Bornmut»da Rayan bilan birga ishlagan) futbolchiga ijobiy baho berdi va uning salohiyatini juda yuqori deb hisoblaydi. «Qizillar» futbolchi joriy yilning yanvar oyida «Vasko da Gama»dan Angliyaga koʻchib oʻtishidan oldin ham unga qiziqish bildirishgandi, biroq «Bornmut» tezroq harakat qilib qolgan. Mavsumning ikkinchi yarmida Rayan Premer-liganing 13 ta uchrashuvida 5 ta gol va 2 ta golli uzatmani amalga oshirib, chempionatga juda tez moslashib ketdi hamda Braziliya terma jamoasining JCh-2026 uchun qaydnomasidan joy oldi.

Manbaning bergan ma'lumotlariga koʻra, futbolchining shartnomasida 130 million funt (153 million evro) miqdorida tovon puli (tovon pulini toʻlab sotib olish bandi) koʻrsatilgan, biroq bu band eng kamida 2027 yildan boshlab kuchga kiradi. Ayni damda «Bornmut» vaziyatni toʻliq nazorat qilmoqda va oʻz transferidan atigi yarim yil oʻtgan eng istiqbolli oʻyinchilaridan birini qoʻyib yubormoqchi emas. «Liverpul»dan tashqari, Rayanning vaziyatini «Barselona», «Bavariya» va «Pari Sen-Jermen» klublari ham kuzatib bormoqda. Shuningdek, mersisaydliklar muqobil variantlarni, jumladan, «Brayton»dan Yankuba Minte va Krisensio Sammervill nomzodlarini ham koʻrib chiqishda davom etmoqda.

Manba: championat.asia