"Man Siti" homiylik bitimlari summalarini oshirib koʻrsatganini rad etdi

Oʻtgan haftada "shaharliklar" APLning moliyaviy qoidalarini buzish boʻyicha deyarli barcha ayblovlar boʻyicha aybdor deb topilgani haqida ma'lumot paydo boʻldi — faqat bittasidan tashqari. 2023 yilning fevral oyida APL "Siti"ni 2009 yildan 2018 yilgacha boʻlgan davrda moliyaviy qoidalarning 115 ta turli buzilishida ayblagan edi. Keyinchalik The Times gazetasi gap 115 ta emas, balki 130 ta qoidabuzarlik haqida ketayotganini xabar qildi: Premer-liga endigina ayblovlarni e'lon qilganida, ba'zi qoidalar boʻyicha chalkashlik yuzaga kelgan edi.

Kecha APL klub barcha ayblovlar boʻyicha aybdor deb topilganini ma'lum qildi. Xususan, bu 2009/10 yilgi mavsumdan 2017/18 yilgi mavsumgacha qoʻllangan "yashirin moliyalashtirish sxemasi"ga tegishli: ushbu davr mobaynida "Siti" umumiy hisobda Abu-Dabidagi homiylardan 949,94 mln funt olgani haqida hisobot bergan. Vaholanki, aslida hamkorlar faqat 119,25 mln funt toʻlashgan — qolgan qismini (830,69 mln funt) klubga egalik qiluvchi Abu Dhabi United Group (ADUG) kompaniyasi qoplagan.

Tekshiruvlar davomida "Man Siti" ushbu sxema mavjudligini rad etdi. Klub bayonotiga koʻra, homiylarning oʻzlari yuqorida koʻrsatilgan summani oʻz manbalaridan toʻliq toʻlashgan, ADUG esa qoʻshimcha mablagʻ kiritmagan.

Shu bilan birga, "shaharliklar" klub hamkorlari shartnoma boʻyicha oʻz majburiyatlarini bajarish uchun ba'zan Abu-Dabi hukumatiga moliyaviy yordam soʻrab murojaat qilishganini va ularning soʻrovlari qanoatlantirilganini ta'kidlashdi. Har bir holatda Abu-Dabi hukumati tomonidan taqdim etilgan moliyaviy yordam hajmi ayblov tomoni ADUG badallari deb hisoblagan summaga mos kelgan.

Ushbu ishni oʻrganayotgan mustaqil komissiya klubning bunday izohlarini yolgʻon deb topdi va rad etdi. U "Siti" tekshiruv boshlanganidan keyin mablagʻlarning haqiqiy kelib chiqishini yashirishga urinib, ushbu argumentlarni oʻylab topgan degan xulosaga keldi.

Manba: championat.asia