Kuchli beshlik sharhi: Londonda derbi, Italiyada grandlar jangi, “Real” va “Barsa” safarda

Bu hafta Angliyada “Arsenal” va “Chelsi” oʻrtasidagi London derbisi markaziy oʻyinga aylansa, Italiyada bir turning oʻzida ikkita katta toʻqnashuv oʻtkaziladi. 

Ispaniyada “Real” va “Barselona”ni oson boʻlmagan safarlar kutmoqda, Germaniyada “Bavariya” Bundesligaga qaytgan “Shalke” mehmoni boʻladi. Frantsiyada esa hali gʻalaba qozonmagan PSJ peshqadam “Monako”ni qabul qiladi.

Angliya: “Emireyts”da London derbisi

Premer-liganing 3-turida asosiy e'tibor “Arsenal” va “Chelsi” oʻrtasidagi London derbisiga qaratiladi. Ikki jamoa ham chempionatni ikki gʻalaba bilan boshladi, shu bois “Emireyts”dagi uchrashuv ular uchun mavsumdagi dastlabki jiddiy sinovlardan biri boʻladi.

“Arsenal” dastlabki ikki uchrashuvda maksimal olti ochko oldi va oʻz darvozasidan gol ham oʻtkazmadi. “Chelsi”ning starti esa boshqacharoq — jamoa ikki oʻyinda ettita gol urdi, shu bilan birga oltita gol oʻtkazib yubordi. Shu jihatdan derbida ikki xil uslub toʻqnashadi: “Arsenal”ning tartibli va muvozanatli oʻyiniga “Chelsi”ning ochiq va hujumkor futboli qarshi turadi.

“Manchester Siti” oʻz maydonida “Koventri”ni qabul qiladi. Kuchlar nisbati boʻyicha mezbonlar yaqqol favorit va chempionlik uchun kurashda bunday uchrashuvlarda ochko yoʻqotmaslik muhim.

“Manchester Yunayted” “Everton” mehmoni boʻlsa, “Liverpul” “Ipsvich” maydoniga safar qiladi. “Tottenxem”ni esa “Nottingem Forest”ga qarshi mehmondagi oʻyin kutmoqda.

3-tur taqvimi:

• “Ipsvich” — “Liverpul” 4 sentyabr, 00:00

• “Nyukasl” — “Bornmut” 5 sentyabr, 16:30

• “Brentford” — “Sanderlend” 5 sentyabr, 19:00

• “Brayton” — “Lids” 5 sentyabr, 19:00

• “Fulxem” — “Kristal Pelas” 5 sentyabr, 19:00

• “Manchester Siti” — “Koventri” 5 sentyabr, 19:00

• “Nottingem Forest” — “Tottenxem” 5 sentyabr, 19:00

• “Xall Siti” — “Aston Villa” 5 sentyabr, 21:30

• “Everton” — “Manchester Yunayted” 6 sentyabr, 18:00

• “Arsenal” — “Chelsi” 6 sentyabr, 20:30

Ispaniya: “Real”ni Sevilya, “Barselona”ni esa “Mestalya” sinovi kutmoqda

La Liganing 4-turi “Betis” va “Real” uchrashuvi bilan boshlanadi. Madridliklar mavsumni magʻlubiyatsiz boshladi, ammo Sevilyadagi oʻyin jamoa uchun chempionatdagi dastlabki jiddiy safar sinovlaridan biri boʻladi.

“Betis” oʻz maydonida noqulay raqib boʻla oladi. Shu bois “Real” uchun Sevilyada uch ochko olish chempionlik poygasining boshida muhim natija boʻladi. Mezbonlar madridliklarga toʻpni erkin nazorat qilish imkonini bermaslikka va oʻyinni imkon qadar teng kurashda olib borishga harakat qiladi.

“Barselona” esa “Valensiya” mehmoni boʻladi. Kataloniyaliklar mavsumni sermahsul boshladi va dastlabki uch turdan keyin yuqori sur'atda ketmoqda. Endi ularni “Mestalya”da ancha murakkab oʻyin kutmoqda.

Qogʻozda “Barselona” favorit, ammo “Mestalya”dagi uchrashuvlar kataloniyaliklar uchun har doim ham oson kechavermaydi. “Valensiya”ning vazifasi raqibga toʻpni erkin nazorat qilish va oʻzi istagan sur'atda oʻynash imkonini bermaslik boʻladi.

Yana bir e'tiborli uchrashuv Bilbaoda oʻtadi. “Atletik” oʻz maydonida “Atletiko”ni qabul qiladi. “San-Mames”dagi safar madridliklar uchun ham turning jiddiy sinovlaridan biri boʻladi.

4-tur taqvimi:

• “Betis” — “Real” 4 sentyabr, 00:00

• “Atletik” — “Atletiko” 5 sentyabr, 19:15

• “Rayo Valekano” — “Rasing” 5 sentyabr, 21:30

• “Vilyarreal” — “Deportivo” 5 sentyabr, 00:00

• “Valensiya” — “Barselona” 6 sentyabr, 19:15

• “Alaves” — “Osasuna” 6 sentyabr, 21:30

• “Malaga” — “Levante” 6 sentyabr, 21:30

• “Espanol” — “Sevilya” 6 sentyabr, 00:00

• “Xetafe” — “Selta” 7 sentyabr, 22:00

• “Elche” — “Real Sosedad” 7 sentyabr, 00:30

Italiya: “Inter” — “Napoli” Milanda, “Yuventus” — “Milan” Turinda

Bu hafta kuchli beshlikdagi eng qiziq afishalardan biri Italiyada. A Seriyaning 3-turida bir kun oraligʻida “Inter” — “Napoli” va “Yuventus” — “Milan” uchrashuvlari oʻtkaziladi.

“Inter” chempionatni ikki gʻalaba bilan boshladi va “Napoli”ga qarshi oʻyinga maksimal natija bilan etib keldi. Neapolliklar esa oʻtgan turda “Komo”ga 1:2 hisobida yutqazib, mavsumda ilk bor ochko yoʻqotdi.

Shu bois “San-Siro”dagi uchrashuv ayniqsa “Napoli” uchun muhim. Yana bir magʻlubiyat asosiy raqiblardan biri bilan oradagi farqning mavsum boshidayoq oshishiga olib keladi. “Inter” esa toʻgʻridan-toʻgʻri raqibini magʻlub etib, chempionatdagi muvaffaqiyatli startini davom ettirish imkoniyatiga ega.

Bir kundan keyin e'tibor Turinga koʻchadi. “Yuventus” “Milan”ni qabul qiladi. Ikki jamoa ham dastlabki ikki turni gʻalaba bilan yakunlagani uchun bu bahs faqat katta nomlar toʻqnashuvi emas, balki peshqadamlar guruhidagi muhim oʻyin ham boʻladi.

Bundan tashqari, “Roma” — “Atalanta” uchrashuvi ham turning e'tiborli bahslaridan. Umuman, bu turda yuqori oʻrinlarga da'vogarlarning bir nechtasi oʻzaro toʻqnashadi va uning natijalari chempionat boshidagi kuchlar nisbati haqida dastlabki tasavvurni berishi mumkin.

3-tur taqvimi:

• “Jenoa” — “Komo” 4 sentyabr, 23:45

• “Fiorentina” — “Torino” 5 sentyabr, 18:00

• “Inter” — “Napoli” 5 sentyabr, 21:00

• “Roma” — “Atalanta” 5 sentyabr, 23:45

• “Frozinone” — “Venetsiya” 6 sentyabr, 18:00

• “Parma” — “Montsa” 6 sentyabr, 18:00

• “Bolonya” — “Sassuolo” 6 sentyabr, 21:00

• “Yuventus” — “Milan” 6 sentyabr, 23:45

• “Kalyari” — “Lechche” 7 sentyabr, 21:30

• “Udineze” — “Latsio” 7 sentyabr, 23:45

Germaniya: “Bavariya” Gelzenkirxenda, raqib — Bundesligaga qaytgan “Shalke”

Bundesligada chempionat endi ikkinchi turga kirib kelmoqda. “Bavariya” yangi mavsumni “Shtutgart” ustidan yirik — 5:1 hisobidagi gʻalaba bilan boshladi va birinchi oʻyindayoq yaxshi formada ekanini koʻrsatdi.

Endi Kompani jamoasi Bundesligaga qaytgan “Shalke” mehmoni boʻladi. Gelzenkirxenliklar uchun bu alohida oʻyin — elitaga qaytganidan keyingi dastlabki uy uchrashuvida ular “Bavariya”ga qarshi maydonga tushadi.

Kuchlar nisbati myunxenliklar tomonida, ammo “Shalke”ning oʻz maydonidagi muhiti uchrashuvga qoʻshimcha qiziqish beradi. “Bavariya” uchun esa vazifa aniq — birinchi turdagi sur'atni saqlash va chempionat boshidayoq keraksiz ochko yoʻqotmaslik.

“Borussiya Dortmund” “Xoffenxaym” mehmoni boʻladi. “Bayer” oʻz maydonida “Union”ni qabul qilsa, “Leyptsig” Bremenda “Verder” bilan oʻynaydi.

2-tur taqvimi:

• “Shtutgart” — “Kyoln” 4 sentyabr, 23:30

• “Borussiya Myonxengladbax” — “Elversberg” 5 sentyabr, 18:30

• “Bayer” — “Union” 5 sentyabr, 18:30

• “Xoffenxaym” — “Borussiya Dortmund” 5 sentyabr, 18:30

• “Paderborn” — “Frayburg” 5 sentyabr, 18:30

• “Verder” — “Leyptsig” 5 sentyabr, 18:30

• “Shalke” — “Bavariya” 5 sentyabr, 21:30

• “Gamburg” — “Maynts” 6 sentyabr, 18:30

• “Ayntraxt” — “Augsburg” 6 sentyabr, 20:30

Frantsiya: gʻalabasiz PSJ peshqadam “Monako”ni qabul qiladi

Frantsiya 1 Ligasida turning markaziy oʻyini Parijda oʻtadi. PSJ chempionatning dastlabki ikki uchrashuvida gʻalaba qozona olmadi va endi mavsumni ikki gʻalaba bilan boshlagan “Monako”ni qabul qiladi.

Mavsum endi boshlangan boʻlsa-da, ikki jamoaning starti bu uchrashuvga qoʻshimcha ahamiyat bermoqda. Parijliklar uchinchi turga mavsumdagi ilk gʻalabasini izlab kirib kelayotgan boʻlsa, “Monako” aksincha, maksimal natija bilan Parijga boradi.

Shu bois bosim koʻproq PSJ tomonida. Luis Enrike jamoasi yana ochko yoʻqotsa, “Monako” bilan oradagi farq mavsumning uchinchi turidayoq sezilarli koʻrinish oladi. Mehmonlar esa yaxshi startdan keyin Parijda ham natija qayd etib, chempionat boshidagi mavqeini yanada mustahkamlash imkoniyatiga ega.

Qolaversa, bu PSJ uchun mavsumdagi dastlabki jiddiy raqiblardan biriga qarshi oʻyin. Shuning uchun Parijdagi bahs nafaqat turnir jadvali, balki jamoaning hozirgi holatini baholash nuqtai nazaridan ham muhim.

3-tur taqvimi:

• “Lion” — “Oser” 4 sentyabr, 22:00

• PSJ — “Monako” 4 sentyabr, 00:05

• “Lans” — “Loryan” 5 sentyabr, 20:15

• “Gavr” — “Brest” 5 sentyabr, 23:45

• “Nitstsa” — “Le-Man” 5 sentyabr, 23:45

• “Trua” — “Strasbur” 6 sentyabr, 18:00

• “Anje” — “Renn” 6 sentyabr, 20:15

• “Marsel” — “Parij” 6 sentyabr, 23:45

Manba: championat.asia