Saliba bel jarohati sababli uzoq muddat maydonga tusha olmaydi

“Arsenal” klubi va Frantsiya terma jamoasi himoyachisi Uilyam Saliba bel qismidan olgan jarohati sababli 5 oygacha boʻlgan muddatni oʻtkazib yuboradi.

25 yoshli markaziy himoyachi Ispaniyaga qarshi (0:2) kechgan bahsda maydonga yiqilgan va kuchli ogʻriq tufayli uchrashuvning 30-daqiqasidayoq maydonni tark etishga majbur boʻlgandi.

Taxminlarga koʻra, frantsuz futbolchisiga operatsiya kerak boʻladi, tiklanish jarayoni esa 4 oydan 5 oygacha vaqtni tashkil etadi.

Saliba oʻtgan mavsum barcha musobaqalarda 50 oʻyinda maydonga tushib, oʻz hisobiga 1 ta gol va 1 ta golli uzatmani yozdirib qoʻygandi.

Eslatib oʻtamiz, Frantsiya terma jamoasi JCh bronza medallari uchun Angliya bilan toʻqnash keladi. Uchrashuv 19 iyul kuni 02:00 da boshlanadi.

Manba: championat.asia