Ispaniyadagilar Seutadagi migratsiya inqirozi fonida Marokash bilan JCh-2030ni oʻtkazishdan voz kechishga chaqirishdi

Eslatib oʻtamiz, 30 iyul kuni Afrikaning shimoliy qirgʻoqlarida joylashgan Seuta avtonom shahriga migrantlarning ommaviy ravishda yorib kirishi boshlandi. Bu ispan eksklavi (mamlakatning asosiy eridan ajratilgan va boshqa davlatlar bilan oʻralgan qismi – Sports’‘), u bir tomondan Marokash bilan chegaradosh, ikkinchi tomondan esa Oʻrtaer dengizi bilan yuviladi. Oʻn minglab odamlar Ispaniyaga noqonuniy ravishda kirib keldi, keyinchalik ularning koʻpchiligi Marokashga oʻz ixtiyori bilan qaytib ketdi.

El Mundo xabariga koʻra, Sumar parlament koalitsiyasi Kongressga Ispaniyaning Portugaliya va Marokash bilan birgalikda qabul qilishi kerak boʻlgan JCh-2030 tayyorgarligidagi ishtirokini toʻxtatish haqidagi taklifni kiritdi. Qonun loyihasi matni ostida "Birlashgan soʻllar" partiyasini vakillik qiluvchi uch nafar deputat hamda Quyi palatadagi fraktsiyaning bir nafar vakili imzo chekdi.

Tashabbus mualliflari hukumatni FIFA, Qirollik ispan futbol federatsiyasi (RFEF) va Portugaliya ijroiya hokimiyatini kelgusi turnirning "qoʻshma tashkilotchilikning amaldagi modelini qayta koʻrib chiqish zarurligi"dan rasman xabardor qilishga chaqirdi.

Shuningdek, Sumar hukumatdan RFEF'ga FIFA ustavi va inson huquqlari sohasidagi siyosatiga rioya etilishini tekshirish uchun institutsional mexanizmlarni faolashtirishni hamda Kongressga yarim yil ichida taqdim etilishi kerak boʻlgan "qabul qiluvchi mamlakatlarda inson huquqlari xavflari" boʻyicha mustaqil, ommaviy va yangilangan tadqiqot oʻtkazishni soʻramoqda. Bundan tashqari, tashabbus Seutadagi voqealarning turnirni oʻtkazish bilan bogʻliq inson huquqlari boʻyicha majburiyatlarga ta'sirini baholashni, shuningdek, jiddiy qoidabuzarliklar aniqlangan taqdirda qoʻshimcha choralar koʻrishni taklif qilishni oʻz ichiga oladi.

Deputatlar, shuningdek, FIFAning turnirlarni oʻtkazish huquqini berish tartib-qoidalarini, jumladan, inson huquqlariga rioya etilishini kafolatlaydigan qoidalarni va jiddiy qoidabuzarliklar yuz bergan taqdirda qabul qiluvchi tomon maqomini qayta koʻrib chiqish yoki chaqirib olish imkoniyatini isloh qilishga chaqirdi.

Avvalroq Portugaliyaning Livre yashillar partiyasi Portugaliya rasmiylariga va mamlakat futbol federatsiyasiga Marokashni JCh-2030 tashkilotchiligidan chetlashtirishga erishish taklifi bilan xat yoʻllagan edi

Manba: championat.asia