Infantino FIFA prezidenti lavozimini saqlab qolish uchun yaxshi imkoniyatga ega

Janni Infantino FIFA prezidenti lavozimini saqlab qolish uchun yaxshi imkoniyatga ega.

Eslatib o‘tamiz, iyul oyi oxirida FIFA Jahon chempionati huquqlarini sotish uchun yangi tijorat tuzilmasi bo‘lgan FIFA Forward Enterprise (FFE)ni yaratish rejasini e’lon qildi. Keyinchalik Infantino futbol konfederasiyalarining tanqidlari va UYEFA a’zo davlatlari tomonidan Jahon chempionatini boykot qilish tahdidi tufayli bu g‘oyadan voz kechishga qaror qildi. Shunga qaramay, bir nechta milliy futbol federasiyalari shveysariyalik amaldorni bo‘lajak saylovlarda qo‘llab-quvvatlashni to‘xtatdilar.

Reuters xabariga ko‘ra, bugungi kunga qadar Infantinoga qarshi chiqa oladigan nomzod paydo bo‘lmagan. Bundan tashqari, Janni "kichikroq futbol mamlakatlari va Yevropadan tashqaridagi muhim bloklarda kuchli qo‘llab-quvvatlashga" ega bo‘lishda davom etmoqda.

Ta’kidlanishicha, "PSJ" prezidenti Nasser Al-Xelayfi yuqori lavozimli futbol arboblari tomonidan saylovda g‘alaba qozonish uchun zarur bo‘lgan koalisiyani tuzishga qodir bo‘lgan kam sonli nomzodlardan biri sifatida qaraladi, ammo qatarlikning o‘zi bu lavozimga nomzod bo‘lishdan manfaatdor emas.

KONKAKAF prezidenti Viktor Montalyani ham Infantinoga potensial raqib sifatida ko‘rilgan, ammo u yetarli qo‘llab-quvvatlashga ega ekanligiga ishonch hosil qilmasdan nomzodini qo‘ymaydi.

Futbol rasmiylarining so‘zlariga ko‘ra, saylovda g‘alaba qozonishga qodir nomzod bo‘lmasa, Infantinoning raqiblari shveysariyalikni lavozimidan chetlatishdan uning vakolatlarini cheklashga e’tibor qaratishlari mumkin. Ularning diqqat-e’tibori "muhim strategik va tijorat qarorlari ustidan nazoratni kuchaytirishga, shuningdek, FIFA rahbariyati ichidagi vakolatlarni qayta taqsimlashga" qaratilishi mumkin.

Xalqaro futbol federasiyasi (FIFA) prezidentlik saylovlari 2027 yil 18 mart kuni Rabatda bo‘lib o‘tadi. Nomzodlar 18 noyabrgacha ro‘yxatdan o‘tishlari kerak.

Manba: stadion.uz