2025/26 yilgi mavsumda "Barsa"ning zarari 18 mln evroni tashkil etdi. Klub 1,06 mlrd evrolik rekord daromadga ega boʻldi

As xabariga koʻra, "koʻk-anorranglilar" ketma-ket uchinchi yil zarar qayd etmoqda. 1,06 mlrd evrolik tushumga qaramay, klub 18 million evro zararga kirdi. Kelayotgan shanba kuni, 19 sentyabrda, klub a'zolari umumiy yigʻilishda moliyaviy hisobotni tasdiqlashlari kerak boʻladi.

"Barsa" oʻtgan yildagidek, zararlar bartaraf etilganini ta'kidlamoqda, chunki muntazam daromadlar foydani koʻrsatmoqda, ammo favqulodda xarajat moddalari moliyaviy koʻrsatkichlarni pasaytirishda davom etmoqda.

Asosiy muammo Barca Productions (klub bilan bogʻliq barcha audiovizual, raqamli va koʻngilochar kontentni yaratish, tarqatish va tijoratlashtirish uchun toʻliq javobgar boʻlgan shoʻ'ba mediakompaniyasi) qiymatini pasaytirish zarurligidadir. Yakunlangan moliyaviy yilda uning qiymatini 23 million evroga kamaytirishga toʻgʻri keldi, natijada umumiy qiymat 116 mln evroni tashkil etdi.

2023/24 yilgi mavsum uchun moliyaviy hisobotda auditor klubdan oʻsha paytda Barca Vision deb atalgan mediakompaniya investorlari oldidagi qarzdorlikni uzish uchun 141 mln evro miqdorida zahira yaratishni talab qilgan edi. Oʻshanda "Barsa" ushbu aktivni 408 mln evroga baholagan edi. Keyingi mavsumda kataloniyaliklar oʻz ulushlari sababli Barca Productions qiymatini yanada kamaytirishdi — 90 mln evroga va umumiy qiymatni 178 mln evroga etkazishdi. Hozirda "Barselona"ning kompaniyadagi ulushi 63 foizni tashkil etadi. Ushbu muammoning echimi yoki Barca Productions qiymatini oshirish, yoki yangi investorlarni jalb qilish boʻlishi mumkin, ammo buning ehtimoli kam. Ungacha "Barselona" aktiv qiymatini bosqichma-bosqich pasaytirishga majbur boʻladi.

Manba: championat.asia