Osiyo Kubogi. Oʻzbekiston va uning raqiblari

2026 yilning 9 may kuni Ar-Riyod shahridagi tarixiy Salva saroyida musobaqaning guruh bosqichiga qur'a tashlash marosimi boʻlib oʻtdi. Aslida ushbu marosim joriy yilning 11 aprel sanasiga belgilangan edi, biroq Yaqin Sharqdagi murakkab geosiyosiy vaziyatlar va mintaqaviy mojarolar sababli barcha milliy assotsiatsiyalar vakillarining toʻliq ishtirokini ta'minlash maqsadida tadbir qariyb bir oyga kechiktirildi. Ushbu qur'a natijalari Osiyo qit'asining eng kuchli 24 ta terma jamoasini oltita guruhga taqsimlab berdi.

Oʻzbekiston milliy terma jamoasi musobaqaning "B" guruhidan joy oldi va unga Iordaniya, Bahrayn hamda Shimoliy Koreya terma jamoalari raqiblik qiladigan boʻldi. Janubiy Koreya sport tahlilchilari tomonidan "oʻlim guruhi" deya baholanayotgan ushbu toʻrtlik oʻzining taktik rang-barangligi, jamoalarning oʻzaro tarixiy qarama-qarshiliklari, va yuqori raqobati bilan ajralib turadi.

Musobaqa formati

Osiyo Futbol Konfederatsiyasi tomonidan tasdiqlangan reglamentga koʻra, musobaqa formati 24 ta jamoani oltita guruhga boʻlishni nazarda tutadi. Har bir guruhdan birinchi va ikkinchi oʻrinni egallagan jamoalar (jami 12 ta jamoa), shuningdek, guruhlarda eng yaxshi koʻrsatkich qayd etgan toʻrtta uchinchi oʻrin egalari avtomatik ravishda 1/8 final (pley-off) bosqichiga yoʻl oladi. Ushbu tizim guruh bosqichidagi har bir ochko, hatto har bir urilgan yoki oʻtkazib yuborilgan golning naqadar ahamiyatga ega ekanligini anglatadi. Qur'a jarayonida adolatni ta'minlash maqsadida jamoalar 2026 yil 1 aprel holatidagi FIFA reytingiga asosan toʻrtta savatchaga (har birida oltitadan jamoa) ajratildi.

Ushbu guruhning xususiyati shundaki, unda Osiyo qit'asining uch xil farqli mintaqasi vakillari jamlangan: Markaziy Osiyoning konservativ va texnikaga asoslangan futboli (Oʻzbekiston), Yaqin Sharqning pragmatik futboli (Iordaniya va Bahrayn) hamda Sharqiy Osiyoning jismoniy kurashlarga asoslangan izolyatsion futboli (Shimoliy Koreya). Taktik nuqtai nazardan bu holat turli xil oʻyin falsafalarining toʻqnashuvini yuzaga keltiradi. Oʻzbekiston va Iordaniya 2026 yilgi jahon chempionatida ishtirok etish orqali tarixiy maqom va ulkan tajribaga ega boʻlgan holda ushbu turnirga etib kelishsa, Bahrayn va Shimoliy Koreya oʻz muxlislari oldida mundialdagi muvaffaqiyatsizlik kompesatsiyasi sifatida bor kuchini Osiyo Kubogiga tashlaydi.

Oʻzbekiston: Peshqadamlikka da'vogar, yangi davr va Kannavaro faktori

"Oq boʻrilar" mazkur turnirga yuqori pozitsiyada tashrif buyuradi. FIFA reytingida 50-oʻrinni egallab turgan va qur'ada 1-savatchadan joy olgan Oʻzbekiston guruhning yaqqol favoriti hisoblanadi.

Oʻzbekiston terma jamoasi uzoq yillik tarixi davomida ilk bor Jahon Chempionati yoʻllanmasini qoʻlga kiritdi. va Markaziy Osiyo mintaqasidan mundialga chiqqan ilk davlatga, sobiq Ittifoq hududidan esa Rossiya va Ukrainadan keyingi uchinchi davlatga aylandi. Bu muvaffaqiyat jamoani JCh-2006 va JCh-2014 saralashlarining pley-off bosqichlarida aynan shu guruhdagi raqiblari – Bahrayn va Iordaniyadan uchralgan alamli magʻlubiyatlar tufayli paydo boʻlgan tarixiy tushkunlikdan xalos etdi. Saralashning uchinchi bosqichida Oʻzbekiston 10 ta oʻyinda 6 ta gʻalaba, 3 ta durang va bor-yoʻgʻi 1 ta magʻlubiyat qayd etib, Erondan keyingi ikkinchi oʻrinni egalladi.

Jamoani JCh-2026 ga olib chiqqan mahalliy mutaxassis Temur Kapadze oʻrnini 2025 yilning oktyabr oyida italiyalik afsonaviy himoyachi, 2006 yilgi jahon chempioni va "Oltin toʻp" sohibi Fabio Kannavaro egalladi. Oʻzbekiston Futbol Assotsiatsiyasi tomonidan Kannavaro oldiga jamoani Jahon Chempionatiga tayyorlash va Osiyo Kubogida chempionlik uchun kurashish vazifasi qoʻyildi. May oyida Kannavaro kengaytirilgan tarkib bilan yigʻinga kirishdi.

U himoyaviy tartib-intizom (an'anaviy italyancha catenaccio elementlarining zamonaviy koʻrinishi), pozitsion joylashuvda bexato harakatlanish va taktik moslashuvchanlikka koʻproq urgʻu berishi tabiiy. Qolaversa, uning shtabidan italiyalik malakali mutaxassislar oʻrin olgan.

Iordaniya: Tizimli rivojlanish

Iordaniya terma jamoasi soʻnggi 5 yil ichida Osiyo futbolidagi eng katta sensatsiyalarni yaratib kelayotgan jamoa hisoblanadi. FIFA reytingida 63-oʻrinni egallab turgan ushbu terma jamoa qur'a paytida 2-savatchadan joy oldi va Oʻzbekistonning guruhdagi birinchi raqamli raqobatchisi sanaladi.

Iordaniya terma jamoasi 2026 yilgi jahon chempionati saralashining uchinchi bosqichida "B" guruhida ikkinchi oʻrinni egallab, tarixda ilk bor Mundial yoʻllanmasini qoʻlga kiritdi. 2025 yilning 5 iyun kuni Maskat shahrida Oʻmonni 3:0 hisobida magʻlub etishi va paralel kechgan oʻyinda Iroqning Janubiy Koreyadan magʻlubiyatga uchrashi Iordaniya uchun tarixiy eshiklarni ochdi.

Ularning Osiyo Kubogidagi soʻnggi natijasi esa fenomenaldir. 2023 yilgi Osiyo Kubogida Iordaniya turnir kashfiyotiga aylanib, pley-off bosqichida Iroq va Janubiy Koreya kabi qit'a grandlarini magʻlub etgan holda finalga qadar etib bordi va faqatgina mezbon Qatarga imkoniyatni boy berdi. Ushbu natija jamoaning ruhiy jihatdan qanchalik kuchli ekanligini va bosim ostida oʻynay olishini koʻrsatadi. Iordaniya Jahon chempionatidagi debyutida Jazoir va Avstriya kabi kuchli jamoalarga, qolaversa amaldagi chempion Argentinaga qarshi kurash olib boradi.

Jamoani ayni paytda marokashlik 55 yoshli mutaxassis Jamol Sellami boshqarmoqda. Sellami Marokashning "Raja Kasablanka" klubi bilan KAF Konfederatsiyalar kubogida zafar quchgan va oʻz oʻtmishdoshi hamda hamyurti Husayn Ammuta yaratgan taktik poydevorni saqlab qolgan holda, jamoaning pragmatik oʻyinini yanada takomillashtirdi.

Iordaniyaning asosiy taktik quroli – toʻpni nazorat qilishni ongli ravishda raqibga berib qoʻyib, himoyada zich joylashish va oʻta tezkor qarshi hujumga oʻtish orqali raqibni jazolashdan iborat Sellami odatda 3-4-3 yoki uning himoyaviy varianti boʻlgan 5-2-3 sxemasidan foydalanadi.

Himoya chizigʻi tajribali oʻyinchilardan tashkil topgan. Darvozada Yazid Abulayla, himoya markazida Abdulloh Nasib, Yazan Al-Arab (Seul FK) va jamoa sardori Ihson Haddad kabi futbolchilar oʻynaydi. Bu chiziqdagilarning termadagi umumiy xalqaro oʻyinlari soni 300 tadan oshadi. Iordaniyaning haqiqiy "oʻldiruvchi" kuchi uning hujum uchligidadir. Yazan Al-Naymat, Ali Olvan va Evropada (Frantsiyaning "Renn" klubida) toʻp tepayotgan Musa Tamari Osiyo qit'asidagi eng kuchli qarshi hujumchi trio hisoblanadi. Iordaniya oʻyinning pozitsion qismida, ya'ni toʻpga egalik qilib, yopiq himoyani buzish talab etiladigan vaziyatlarda muammolarga duch keladi, ammo ular raqib hujumga oʻtib, orqa chiziqda boʻsh zonalar qoldirganda bexato harakat qilishadi.

Oʻzbekiston – Iordaniya: Tarixiy qarama-qarshiliklar

Oʻzbekiston va Iordaniya terma jamoalari oʻrtasidagi tarixiy oʻyinlar statistikasi raqamlar nuqtai nazaridan Oʻzbekistonning sezilarli ustunligini koʻrsatsa-da, bu bahslar doimo asabiy, dramatik va jismoniy kurashlarga boy oʻtgan. Jamoalar shu kunga qadar barcha musobaqalarda 15 marta toʻqnash kelishgan.

Eng bahsli va esda qolarli qarama-qarshiliklardan biri 2013 yilning sentyabr oyida JCh-2014 saralashining beshinchi (pley-off) bosqichida yuz bergan. Ushbu qarama-qarshilik gʻolibi qit'alararo pley-offga yoʻl olishi kerak edi. Amman shahrida oʻtgan dastlabki oʻyin 1:1 hisobida yakunlangan. Toshkentdagi javob uchrashuvida ham 1:1 hisobi saqlanib qolgan. Penaltilar seriyasida esa Iordaniya 9:8 hisobida gʻalaba qozonib (oʻzbekistonlik himoyachi Anzur Ismoilovning hal qiluvchi xatosi evaziga), Oʻzbekistonni mundial yoʻllanmasidan mahrum qilgan edi.

Shuningdek, 2011 yilgi Osiyo Kubogi chorak finalidagi oʻzaro qarama-qarshilikda Oʻzbekiston Ulugʻbek Bakaevning dubli evaziga 2:1 hisobida gʻalaba qozongan.

Iordaniya Oʻzbekiston uchun guruhdagi eng asosiy va taktik jihatdan eng noqulay raqobatchi hisoblanadi. Iordaniya bilan oʻyinda Oʻzbekiston katta ehtimol bilan toʻpga koʻproq egalik qiladi, biroq bu holat Jamol Sellami jamoasi uchun eng qulay stsenariydir. Fabio Kannavaro himoya chizigʻini markazga qarab qanchalik yuqoriga koʻtarishi Musa Tamari va Yazan Al-Naymatning himoyachilar ortidagi boʻsh zonalarga tezkor kirib borishi uchun imkoniyat yaratib berishi mumkin. Ushbu oʻyinda pressingni toʻgʻri tashkil etish va toʻp yoʻqotilgan vaziyatda taktik follar orqali raqibning qarshi hujumini boshlangʻich fazasidayoq buzish hal qiluvchi ahamiyatga ega boʻladi.

Bahrayn: Intizom, mudofaa va hujumdagi inqiroz

Fors koʻrfazi vakillari sanalmish Bahrayn terma jamoasi FIFA reytingida ayni paytda 91-oʻrinda bormoqda va qur'a jarayonida 3-savatchadan joy oldi. Bahrayn Markaziy Osiyo jamoalari uchun eng qiyin raqiblardan biri sanaladi.

Bahrayn 2027 yilgi Osiyo Kubogiga saralashning ikkinchi bosqichi orqali yoʻllanmani naqd qildi. Bu ularning qit'a birinchiligidagi ketma-ket ettinchi va umumiy hisobda sakkizinchi ishtiroki boʻladi. Biroq ularning 2026 yilgi jahon chempionati saralashidagi ishtiroki muvaffaqiyatsizlik bilan yakunlandi.

Saralashning uchinchi bosqichida Bahrayn hujumkorlik va kreativlik borasida jiddiy inqirozga yuz tutdi. Ular oʻz guruhida ketma-ket toʻrtta oʻyinda birorta ham gol ura olishmagan (jumladan, Saudiya Arabistoniga oʻz uyida 0:2 hisobida yutqazishgan). Bahrayn jami 5 ta gol urgan holda guruhda eng yomon hujum koʻrsatkichini qayd etdi va soʻnggi oʻrinni egallab, mundial bilan xayrlashdi. Ushbu muvaffaqiyatsizlikdan soʻng, mamlakat futbol assotsiatsiyasi va jamoa bor e'tiborini 2027 yilgi Osiyo Kubogi va kuzda boʻlib oʻtadigan Fors koʻrfazi kubogiga qaratgan boʻlib, ushbu turnirda ular amaldagi chempion sifatida ishtirok etadi.

Bahrayn terma jamoasini 60 yoshli xorvatiyalik mutaxassis Dragan Talajich boshqarmoqda. Talajich Osiyo va Yaqin Sharq futbolida ulkan tajribaga ega boʻlib, u oʻta intizomli va pragmatik himoyaviy oʻyin koʻrsatish tarafdoridir.

Talajich asosan 4-2-3-1 taktik sxemasidan foydalanadi va maydon markazida ikkita tayanch yarim himoyachisi orqali zichlikni hosil qilib, raqibning hujum chiziqlarini bloklashga e'tibor qaratadi.

Murabbiyning falsafasi "futbol bu – 11 ga 11 oʻynaladigan oʻyin va unda faqat jamoaviy birdamlik orqaligina kuchliroq raqiblarni magʻlub etish mumkin" degan kontseptsiyaga asoslanadi. Talajich Bahrayn terma jamoasida shakllangan psixologik tushkunlikni yoʻqotish, muxlislar ishonchini qaytarish va hukumatning sportga qilayotgan sarmoyalarini oqlash uchun qattiqqoʻl taktik intizom oʻrnatgan.

Jamoaning etakchi oʻyinchilari qatoriga yarim himoyachi Ali Madan (jamoaning asosiy kreativ pleymeykeri), hujumchi Mahdi Abduljabbor hamda tajribali Komail Al Asvad va Muhammad Marhunlarni kiritish mumkin. Jamoadarvozaboni va sardori Sayid Muhammad Jaffar esa 163 ta xalqaro oʻyin bilan terma jamoa tarixidagi eng tajribali oʻyinchi hisoblanadi. Bahrayn terma jamoasi tarixidagi eng yaxshi toʻpurar esa Ismoil Abdullatifdir (48 gol). Bahraynning himoyaviy blogini markazdan yorib oʻtish juda qiyin boʻlib, ular asosan standart vaziyatlar, jarima zarbalari yoki uzoq masofadan yoʻllangan kutilmagan zarbalar orqali xavf tugʻdirishadi.

Oʻzbekiston – Bahrayn: Ogʻriqli xotiralar

Oʻzbekiston va Bahrayn terma jamoalari oʻrtasidagi oʻyinlar tarixi oʻzbek muxlislari uchun unutilmas va oʻta ogʻriqli xotiralarni oʻz ichiga oladi. Jamoalar shu kunga qadar rasmiy va oʻrtoqlik oʻyinlarida jami 11 marta toʻqnash kelishgan. Oʻzbekiston 4 oʻyinda gʻalaba qozongan va 2 bellashuvda yutqazgan. Yana 5 uchrashuvda kuchlar teng kelgan.

Eng mashhur, mojaroli va tragik qarama-qarshilik 2005 yilning sentyabrida 2006 yilgi jahon chempionati saralashining qit'aviy pley-off bosqichida yuz bergan. Toshkentda oʻtgan dastlabki oʻyinda Oʻzbekiston 1:0 hisobida gʻalaba qozonib turgan vaqtda, yaponiyalik bosh hakam Toshimitsu Yoshida penaltini ijro etish vaqtidagi qoidabuzarlik uchun (oʻzbekistonlik futbolchining jarima maydoniga erta kirib ketishi) penaltini qayta teptirish oʻrniga, FIFA qoidalariga zid ravishda Bahrayn foydasiga erkin zarba belgilagan. Oʻzbekiston tomonining shikoyatidan soʻng, FIFA oʻyin natijasini (1:0) bekor qilgan va oʻyinni qaytadan oʻtkazishga qaror qilgan edi. Qayta oʻtkazilgan oʻyin Toshkentda 1:1, Manamadagi javob uchrashuvi esa 0:0 hisobida yakunlanib, Bahrayn safarda urilgan gol qoidasiga koʻra adolatsiz tarzda keyingi bosqichga yoʻl olgan. Shuningdek, 2004 yilgi Osiyo Kubogining chorak finalida ham penaltilar seriyasida Bahrayn Oʻzbekistonni turnirdan chiqarib yuborgan edi.

Biroq, soʻnggi oʻn yillikdagi natijalar Oʻzbekistonning toʻliq ustunligini koʻrsatmoqda. Jumladan, 2015 yilning oktyabrida JCh-2018 saralashi doirasida safarda Oʻzbekiston yirik – 4:0 hisobida zafar quchgan boʻlsa, 2016 yilning martida Toshkentda oʻtgan javob uchrashuvida Sardor Rashidovning goli evaziga 1:0 hisobidagi gʻalaba qayd etilgan.

Bahrayn turnirdagi eng yopiq, pozitsion himoyalanuvchi va oʻyin tempini ataylab pasaytiruvchi jamoalardan biri boʻladi. Murabbiy Dragan Talajich Oʻzbekistonga qarshi oʻyinda oʻz jarima maydonchasi atrofida chuqur himoyaga yotib, hududni maksimal darajada toraytirishga va durang natijani saqlab qolishga harakat qilishi ehtimoli juda yuqori. Oʻzbekiston uchun bunday zich himoyani yorib oʻtishda qanot vingerlarining tezligi, markazdan beriladigan nostandart diagonal uzatmalar hamda jarima maydonchasi ichida jismoniy kurashlarda ustunlik qila oladigan baland boʻyli hujumchilarning (masalan, Eldor Shomurodovning) roli beqiyos boʻladi. Shuningdek, standart vaziyatlardan foydalanish koeffitsienti ushbu oʻyin taqdirini hal qilishi mumkin.

Shimoliy Koreya: Izolyatsiyadagi "Chxollima" va jismoniy kuch

FIFA reytingida ayni paytda 118-oʻrinda borayotgan va qur'a tashlash marosimida eng soʻnggi 4-savatchadan joy olgan Shimoliy Koreya terma jamoasi "B" guruhining eng sirli, axborotdan xoli va oldindan aytib boʻlmaydigan ishtirokchisidir. "Chxollima" (Afsonaviy qanotli ot) laqabiga ega ushbu jamoa geosiyosiy vaziyatlar sababli tez-tez xalqaro musobaqalardan chetda qoladi, ammo ishtirok etgan paytlarida oʻzining murosasizligi, tartib-intizomi va soʻnggi daqiqagacha kurashishi bilan ajralib turadi. Ularning past reytingi jamoaning real kuchini emas, balki xalqaro oʻrtoqlik oʻyinlarida kam ishtirok etishi oqibatida reyting ochkolarining yoʻqotilishini koʻproq aks ettiradi.

Shimoliy Koreya JCh-2026 saralashining ikkinchi bosqichida muvaffaqiyatli ishtirok etib, ham Jahon chempionati saralashining uchinchi bosqichiga, ham Osiyo Kubogiga yoʻllanma oldi. Biroq hal qiluvchi uchinchi saralash bosqichida ular kuchli qarshilikka duch kelishdi va guruhda soʻnggi oʻrinlardan birini egallashdi. Jumladan, jamoa Oʻzbekistondan tashqari Qatar (1:5), BAA (1:2) va Eron (0:3) kabi kuchli jamoalarga magʻlub boʻldi. Guruhdagi boshqa bir markaziy osiyo jamoasi – Qirgʻiziston bilan ular 2:2 hisobida jangovar durang oʻynashdi. Natijada, shimolliklar JCh-2026 ga chiqish imkoniyatini butunlay boy berishgan.

Bosh murabbiy Sin Yong-nam qoʻl ostidagi jamoa sovet davriga xos boʻlgan qattiqqoʻl murabbiylik diktaturasi, benuqson taktik intizom va oʻta yuqori darajadagi jismoniy tayyorgarlikka asoslangan futbol namoyish etadi. Ularning oʻyin uslubi toʻpga egalik qilish yoki kombinatsion futbol qurishdan koʻra, raqibni tinimsiz, agressiv pressing ostida ushlab turish, maydonning har bir qarichi va har bir toʻp uchun kurashish hamda oʻyin tempini jismoniy toʻqnashuvlar orqali buzishga qaratilgan.

Jamoa tarkibida koʻpchilik futbolchilar mahalliy, yopiq ligada ("Xvaebul", "Rimyongsu", "Sonbong" kabi klublarda) toʻp tepadi, bu esa ularni oʻrganishni qiyinlashtiradi. Ularning eng koʻzga koʻringan oʻyinchisi – bir vaqtlar Italiya A Seriyasida ("Kalyari") va hatto "Yuventus" tizimida toʻp tepgan, hozirda esa jamoaning asosiy kreativ kuchi hisoblangan Xan Kvang Songdir (uning hisobida JCh saralash bosqichida 3 ta assist mavjud). Shuningdek, terma jamoa tarixidagi eng yaxshi toʻpurar Jong Il-gvan (31 ta gol) hamda markaziy yarim himoyachi va sardor Jang Kuk-chol jamoaning oʻzagini tashkil etadi. Shimoliy Koreya himoyada pozitsion xatolarga yoʻl qoʻyadi (ular hal qiluvchi saralashda har oʻyinda oʻrtacha 2.5 tadan gol oʻtkazib yuborishgan), ammo ularning charchamasdan 90 daqiqa yugura olishi raqiblar uchun katta jismoniy sinov hisoblanadi.

Oʻzbekiston – Shimoliy Koreya: Mutlaq gegemonlik

Oʻzbekiston va Shimoliy Koreya oʻrtasidagi uchrashuvlar soʻnggi oʻn yillikda Oʻzbekistonning toʻliq gegemonligi ostida oʻtmoqda. Ikki jamoa oʻrtasidagi soʻnggi 5 ta oʻyinning barchasida Oʻzbekiston gʻalaba qozongan.

Shulardan eng soʻnggilari 2024 yilning kuzida JCh-2026 saralashining uchinchi bosqichi doirasida boʻlib oʻtgan. Toshkentda kechgan oʻyinda Jalaliddin Mashharipovning goli evaziga 1:0 hisobida gʻalaba qozonilgan boʻlsa, Laosda oʻtgan neytral maydondagi javob oʻyinida ham Oʻzbekiston xuddi shunday hisobda zafar quchdi. 2024 yil 19 noyabr kuni boʻlib oʻtgan oʻsha asabiy oʻyinda Abbosbek Fayzullaevning 44-daqiqada Bobur Abdixoliqovning uzatmasidan soʻng urgan yagona goli evaziga gʻalaba qozonilgan. Oʻyinning 83-daqiqasida Umar Eshmurodov qizil kartochka olib maydondan chetlatilgan, 85-daqiqada esa Shimoliy Koreya hujumchisi Jong Il-gvan penaltini aniq amalga oshira olmagan edi (Oʻtkir Yusupov har ikki oʻyinda raqib penaltisini bartaraf etib, qahramonlik koʻrsatgan). Mazkur oʻyin Shimoliy Koreyaning qanchalik qaysar raqib ekanligini yana bir bor isbotladi.

Statistika, mahorat va tajriba Oʻzbekiston tomonida boʻlsa-da, Shimoliy Koreya bilan oʻyin hech qachon oson kechmagan. Odatda bu jamoa bilan rasmiy oʻyinlar 1:0 koʻrinishidagi minimal hisoblarda va katta asabbuzarlik ostida yakunlanadi. Bunday oʻyinlarda birinchi golni tezroq urish va oʻyin taqdirini ertaroq hal qilish oʻta muhim, chunki vaqt oʻtgan sari va hisob teng boʻlib turgan holatda Shimoliy Koreya himoyaga chuqurroq oʻrnashib oladi va follar, qoʻpolliklar orqali oʻyin ritmini buzadi. Musobaqaning guruh bosqichida bunday raqib bilan oʻynash katta energiya talab qiladi, bu esa asosiy futbolchilarning charchashiga yoki turnirning keyingi bosqichlari oldidan jarohat olishiga olib kelishi mumkin.

Taqvimning oʻziga xosligi shundaki, Oʻzbekiston turnirni eng kuchli va taktik jihatdan noqulay raqib – Iordaniyaga qarshi boshlaydi. Odatda, yirik musobaqalarda birinchi oʻyin butun turnirning ruhiyatini belgilab beradi. Agar Kannavaro shogirdlari Iordaniyaning xavfli triosini zararsizlantirib, gʻalaba qozona olsa, jamoa katta psixologik ustunlikka ega boʻladi va keyingi ikki oʻyinda tarkibni qisman rotatsiya qilish imkoniyatiga ega boʻladi.

Muhim logistik jihat shundaki, Oʻzbekiston birinchi oʻyinni Qizil dengiz boʻyidagi Jiddada oʻtkazib, soʻng ikkinchi tur uchun mamlakat markazidagi Ar-Riyodga safar qiladi va uchinchi tur uchun yana Jiddaga qaytishga majbur boʻladi. Iqlimiy oʻzgarishlar hamda safarlar tiklanish jarayoniga ta'sir qilishi mumkin.

Ikkinchi turda Shimoliy Koreyaning zich himoyasini yorib oʻtish talab etiladi. Bunda maydon markazida kreativlik va standart vaziyatlar muhim. Uchinchi turda esa Bahrayn bilan durangga rozi boʻladigan yoki qarshi hujumga tayanadigan Talajichning pragmatik tizimiga qarshi bosh qotirish kerak boʻladi. Agar Oʻzbekiston soʻnggi turga qadar pley-off masalasini hal qila olmasa, Bahrayn kabi raqibga qarshi hal qiluvchi oʻyin oʻtkazish katta asabbuzarlikni keltirib chiqaradi.

Guruhdan chiqish imkoniyatlarini matematik va taktik modellashtirish asosida koʻrib chiqsak, Oʻzbekiston va Iordaniya terma jamoalari yaqqol favoritlardir. Mazkur turnir formatida 3 ta oʻyindan kamida 4 ochko toʻplagan jamoaning keyingi bosqichga (hatto eng yaxshi uchinchi oʻrin orqali boʻlsa ham) chiqish ehtimoli 90% dan yuqori boʻladi.

Oʻzbekistonning guruhdan birinchi oʻrin bilan chiqish ehtimoli Fabio Kannavaroning jamoani qisqa muddatli turnirga qanday tayyorlashiga, himoya chizigʻining Iordaniya tezligiga dosh berishiga va jamoaning JCh-2026 dan keyingi emotsional barqarorligiga bogʻliq. Agar himoya chizigʻida individual xatolarga yoʻl qoʻyilmasa, Oʻzbekiston guruhni 7 yoki 9 ochko bilan peshqadam sifatida yakunlash uchun barcha resurslarga ega.

Iordaniya esa oʻzining "ikkinchi raqam" boʻlib oʻynash uslubi orqali ham Oʻzbekistonga, ham boshqalarga katta muammo tugʻdiradi va kamida ikkinchi oʻrinni naqd qilishi kutilmoqda. Bahrayn Iordaniya yoki Oʻzbekistondan kamida bitta ochko tortib olib, Shimoliy Koreyani minimal hisobda magʻlub etgan holda 4 ochko bilan uchinchi oʻrin orqali pley-offga ilinib qolishga (yoki Iordaniya xato qilsa ikkinchi oʻrinni olishga) harakat qiladi. Shimoliy Koreyaning imkoniyatlari esa ob'ektiv sabablarga koʻra eng past baholanmoqda, ular guruhda ochko ulashuvchi vazifasini bajarib berishlari kutilmoqda, ammo ular bilan oʻyinlarda yoʻqotilgan energiya pley-off bosqichida boshqa jamoalarga pand berishi mumkin.

Manba: championat.asia