Bordo"ning Frantsiya 6-ligasiga oʻtkazilishi boʻyicha apellyatsiyasi rad etildi

Eslatib oʻtamiz, iyun oyi oxirida Milliy boshqaruv nazorati direktsiyasi (DNCG) klubni 2026/27 yilgi mavsum uchun milliy darajadagi barcha musobaqalardan chetlashtirdi. "Bordo" 2026/27 yilgi mavsum uchun byudjetni 30 iyunga qadar tasdiqlashi kerak edi – jirondinliklardan qoʻshimcha 9 million evro kiritish talab qilingandi. Biroq, na klubning amaldagi egasi Jerar Lopes, na potentsial xaridorlar 30 iyunga qadar tegishli kafolatlarni taqdim etishga ulgurishmadi.

Shu munosabat bilan "Bordo" Birinchi mintaqaviy divizionga – Frantsiyaning kuchi boʻyicha oltinchi ligasiga oʻtkazildi. Klub ushbu qaror ustidan shikoyat qildi.

Apellyatsiya boʻyicha tinglov bugun boʻlib oʻtdi – unda Jerar Lopes, klub bosh direktori Arno Sent-Andre, shuningdek, yuristlar va qayta tiklash rejasini kuzatuvchi komissar ishtirok etdi. Ular bir soatdan sal koʻproq vaqt davomida soʻzga chiqishdi.

"Bordo" hamon qoʻshimcha mablagʻ jalb qila olmadi. Shu bois, DNCG apellyatsiya qoʻmitasi klubni oltinchi divizionga oʻtkazish toʻgʻrisidagi qarorni kuchida qoldirdi.

Foot Mercato nashrining Sud Ouest manbasiga tayanib xabar berishicha, bugungi tinglovda Lopes oxirgi chorani taqdim etdi: klubni sotib olish uchun tender e'lon qilish va "Bordo"ni barqaror moliyalashtirishga kafolat bera oladigan investorni topish. U allaqachon potentsial investorlardan qiziqish bildirgan bir nechta xabarni olgan.

Frantsiyaning olti karra chempionida sanktsiyalar toʻgʻrisidagi qaror ustidan Frantsiya Olimpiya qoʻmitasiga shikoyat qilish huquqi hali ham bor.

"Bordo" soʻnggi ikki mavsumni Frantsiyaning kuchi boʻyicha toʻrtinchi divizionida oʻtkazdi – 2024 yilda moliyaviy muammolar tufayli klub quyi ligaga tushirib yuborilgandi.

Manba: championat.asia